،،،،،،،،،،، الجزء الأول من قصتى أحلام مسروقه صباح سالم

كنت فاكره إنى قادره محدش يقدر يسحب بُساطى
كنت فاكره إنى قادره ألجم حصانى

كنت فاكره إنى قادره أقنعه
 ميضيعش عا الفاضى تعبى  بسنين حياتى

كنت فاكره إنه مش حينسى قد إيه تعبت
وإنى عشانه جفانى النوم ،، وبفكرى سنين سرحت

كنت فاكره إنه حيكون الحلم الجميل
لما يجينى ويقولى خلاص إخترت
وضحكتى من فرحتى تشفينى م الوجع والضغط

مكنتش عارفه إنه إنحط
وحط على واحده مش مناسبه
حاجه كده قايمه نايمه تحب فيه

خبره يا ابنى ،، ومتقوليش سن إيه
جوه الغرف اللى زيك ،، بيقول عا الجواز الله عليه

نفسى أعرف لما يسألوك حتقول إيه
ولا ساعتها حتنكسف
ولا حيبقى سرى ومش ينعرف
ولا حتقول دا هزار يامه ،، هو أنا منحرف

خايفه تكون صدقت الكلام
يا ابنى دا شغل وحوارات أفلام

قصر الكلام الشباب للشباب
ليه متمسك بالضباب
كنا عايشين مع ربنا واصلين السحاب

مفيش حاجه إسمها حب فى الحاله دى
دا عاطفه خاينه،،  فكرها ترجع السنين
أو إنى ح اسمح لها توجع قلبى الحزين
تسرق منى اللى نسى إنه كان ببطنى جنين
يا ابنى والله أنا مكسوفالها

يا حاجه يللىِ
دَوَرِيِلك  عاَلِيِ
مناسب ليكى ويسهر معاكى ما يخلى

شوفى عربى يقولك هلى
أو مصرى إبن حنت يقولك تنشلى

أما أنا خُديها منى نصيحه ومتعمليش فصيحه
بلاش تدخلى معايا فى نطيحه

اللى منى منى هو العين والننى
هو فرحتى بعروسه تخبله وتخبلنى
مش واحده لساها بتدلع من سنى

يا ابنى مش دى اللى حتفرقنا ولا حتغرقنا
صاحبها ،، الصراحه صفحتها شكلها مريبه
دى لو قطه صغيره متكتبش الحب ده ولهيبه

دى رايقه وعايقه
بلا رادع أو مسئوليه
ف متطلبش منى حاجه فوق الطاقه
انا ب اموت بكل لحظه لما حسيتك بمعرفتها بقيت خواجه

ضحكتك مش هيا
صدقنى مش ديه
 اللى تأثر عليك وتهننك بالملاغيه
دى نفوس يا ابنى متحرره من ده ل ده وبخيبتها ملهيه

ف اياك تقع ف المطب وتوهم نفسك إنه حب
يا ابنى  ،، مالها الصبيه

عموما كل واحد يعمل اللى عليه
بس متقولش إختيارى تقبليه

يااااه عا السنين لما افتكر الدموع والوجع
 والقلب اللى اتنبح
 والسهر اللى ترك علاماته
والمُر اللى بسببه واجهته وعانيته

عايزه أقولك كلمه واحده
مش من حقك تسرق منى حلمى بيك
مش من حقك تبيع شبابك للى يشتريك

مش من حقك تشمت فيا الأندال واللى ما يسووش
مش من حقك تطفى شمعتك  وفكرك الناس ميتكلموش

مش من حقك تعيشنى ب ويل وليل طويل
ماعدش خلاص فى قُدره يا ابنى
والله قلبى صار عليل
خلينا بصرحنا هادين قبل ما الدنيا بيك تميل
،،،،،،،،،،،
الجزء الأول من قصتى
أحلام مسروقه
توثيق هيام برهان
إشراف لطيفة يونس