عن المؤتمر العام للتصوف..بقلم شيخ السجالات البدري زايد
عن المؤتمر العام للتصوف
لما سيدنا الشيخ دعانا
قلت يبقي الفرح جانا
والهنا ضلل علينا
والضيوف اللي معانا
سيدنا قاللي بكرة تحضر
مؤتمر ح يقيمه لازهر
ع التصوف والطريقة
واعرف ان الدين حقيقة
وف شريعته مبتغاه
هو توحيد الإله
والتزم جوة المقام
بالهدوء والاحترام
والسكينة والتخلي
والزم الأذكار وصلي
ع النبي خير البرية
وانسي ذاتك لو شوية
والمريد بيزيد بهاه
لو ف حالت الوجد تاه
والطريق كله محبة
والسلام بين الأحبة
واطعم المسكين تلاقي
إن دة هو اللي باقي
واقرا قرآنك ووردك
يبقي يابختك ياسعدك
واعرف ان فروضنا خمسة
الشهادتين بس لسة
الصلا تحافظ عليها
والفلوس دي تزكي بيها
والصيام دا علينا واجب
ف المشارق والمغارب
لو قدرت ياريت تحج
واعرف انك لو تهج
م الدنايا والمعاصي
مش ح تلقي القلب عاصي
والتصوف مش نفاق
ولا ترقيع الهدوم
ولا تغرق ف الرياء
ولا تهرب م الهموم
ولا تسكت ع المظالم
ولا ترضي بالمغانم
التصوف ف السماحة
واللطافة والصراحة
والتصوف ف الجهاد
لاجل تذكير العباد
هو دا أصل التصوف
مش بازور ولا ازيف
والخلاصة ف الختام
توصيات سيدنا الإمام
إن مهر الجنة غالي
عاوزة سهار الليالي
اللي صاموا واللي قاموا
واللي ليلهم لم يناموا
مهما قال الناس وعادوا
ف المحافل ولا زادوا
اعرف انك م المهالك
تنجا لو مخلص وسالك
تنجا لو مخلص وسالك.
تحياتي
شيخ السجالات
البدري زايد.
تعليقات
إرسال تعليق