ليه مخاصمني..؟ بقلم الشاعرة المبدعة جيهان النجار
ليه مخاصمني!!؟؟
شعر/جيهان النجار
****************
والله زمان يا شعر
ليه بس مخاصمني ؟
عايزة أقـول .. وأعيد
أسكر كما المساطيل
حيرانة .. مبسوطه
ف الفكرة طول الليل
يطلع عليّ الفجر
وانا لسة ما كتبتش
كلمة فى بيت مهجور
مفتاحه ضاع مني
والله خصامك طال
بالله تطمني
أنا لسة على عهدك
إياك تغيب عني
ح سهر معاك .. واكتب
ع العشق والعاشقين
ياماااااا هز شناب
صبحوا من المجانين
باعو الغالى رخيص
لجل سواد العين
ماتوا ف شرع العشق
شهدا من المساكين
هكتب واقول دواوين
عن أمه مخطوفه
ندهت عليها ف يوم
نداهه محدوفه
من صلب مسيح دجال
ذنوبها بالزوفه
ممسوخه منتوفه
مكتوب عليها الذل
بصيرتها مطروفه
لولا ضعاف .. وشيوخ
صبحت من الهالكين
هكتب كلام عن دين
من ربنا القهار
يستر علينا آمين
من بطشة الغدار
يبعت جنود خلقه
يكفونا ذل العار
تتشق لهم الأرض
تخسف الظالمين
هحكي وأقول أشعار
في الغدر والغدار
ح أصرخ اااقول يا بنى
اياك تسيب التار
الأرض عرض وفرض
انت من الأحرار
رجعها لو بالدم
من قبضة الغاصبين
هكتب غنا و مواويل
ع الفن والمغني
لازم يكون الشعر
بالوزن والمعني
ح بعت بيوت الشعر
للقلب والوجدان
أجمل كلام أنكتب
يخلق ما بينا أمان
نعلم العالمين
فاهم كلامي يا شعر
يا جنة المخابيل
اوعى تخاصمني
لا اصبح من المساجين
جوه زنازينهم
زنازين م العتمه
مفتوحه ع الشارع
شارع ماهوش شرعي
ولا لوهش فى التشريع
شارع جبان .. مشرك
بحجة التجويع
فى آخره سد منيع
مكتوب عليه صامتين
يلا يا عم الشعر
جدد معايا العهد
واوعد جناب حضرتك
يفضل ما بنا الود
اسمع واقول واعيد
اسكر كما المساطيل
اسهر معاك للصبح
نكتب حكاوينا
تصبح من الخالدين٠
تعليقات
إرسال تعليق