أنا عايز اتجوز سجال بقلم شيخ السجالات البدري زايد
مشاركتي في سجال أنا عاوز اتجوز
أنا عاوز اتجوز واتهنى
وأعيش مع واحدة من الجنة
انسية لاكين زي ملاك
تديني كل اللي اتمني
أنا نفسي اتجوز جنية
تسقيني من الحب شوية
ولا تسأل عن شقة ولاجهاز
ولا يوم مرة بتاسي عليا
انا نفسي اتجوز رقاصة
بتهز وتلعب وخلاصة
وبتكسب وبتعمل بزنس
ولايمكن حتكون قماصة
وانا نفسي اتجوز عسلية
وحليوة تحب الملاغية
وتساعد في العيشة تملي
بحبوحة وماهش نكدية
أنا عاوز اتجوز بنوتة
بالحب تغمس فتفوتة
وتوافق تسكن ف إمبابة
علي قد الحالة وبسكوتة
أنا عاوز اتجوز وخلاص
واختارها مابين كل الناس
ع الزيرو وحلوة وامورة
وف فرحي مفيش ضرب رصاص
لو قلت انا عاوز نكدية
ينهد البيت كله عليا
وساعتها راح اندم ياحبايبي
ولا ينفع ضرب ولا أذية
وان قلت انا عاوز مستورة
ايه يعني المنظر والصورة
راح اعيش العمر مع وحاشة
مغموم وف غمي انا أسطورة
الواحد لازم يتوازن
ويفاضل طبعاً ويقارن
يتاني وياخد ذات الدين
والتاجر دايماً بيعاين
دي بضاعة وعاوزة التفكير
والعيشة لازمها التدبير
والزوجة لكل الحب أساس
اختارها تعيش العمر أمير
ومفلس عاوز يتجوز
جاتو نيلة الفقري كدة مبوز
ولا يسأل فيكي ولا بيصرف
منفوخ ع الفاضي ومتنرفز
الراجل لو قال ياجواز
ع الشبكة يدور وجهاز
ويجيب الشقة ولوازمها
تلاجة ونجفة وبوتاجاز
ويكون ع الست كدة محافظ
وكلامه يكون دوغري ونافذ
ومواقفه أصيلة ومعقولة
ورجولة ودايما كدة جاهز
أنا كدة لخصت الموضوع
ولاتزعل ولا تبقي خنوع
وتفكر يابني انت وهية
ف جوازكم خد لك أسبوع
وتفكر قبل ما تختار
وان رحت لحد العطار
خليه يعملك توليفة
م الدين والأصل لست الدار
وتحط عليهم ذوق وجمال
وياريت تخلطهم بالأموال
تحويجة أكيدة ومضمونة
وأسأل ع الدين ميت ألف سؤال.
تحياتي
شيخ السجالات
البدري زايد.
تعليقات
إرسال تعليق