حوارية عتابا بين الشعراء ...بقلم الشاعر د. عيسى عيسى
بالامس جرت حوارية عتابا على هذا المنتدى الرائع
ردا على موال لي قام بها بالاضافة للدكتور سليمان اسود
الدكتور برصوم كساب الاستاذ مفيد نبذو الدكتور ثابت عبدالله
والآن اريد ان انشر الكثير منها
علها تنال اعجابكم وتكون حافذنا للحوار الإنساني الخلاق بيننا
فقد كنت قد نشرت
الموال التالي :
حبيب القلب وقفني ع بابو
خايف اسرق الجو عبابو
نهر النيل والجوا عبابو
ما يطفو نار قلبي واللهب
فرد عليّ الدكتور سليمان اسود
اعطيني من وحي فكرك عتابا
بنيا وطاب ياعيسى عتابا
ودار الفن إن برفع عتابا
مابدي غير عيسى ع الطلب
فأجبته :
العتابا باسمنا مدقوق اسما
تنرفع شأنها بالحرف اسما
وأنا الحبيت من النسوان أسما
اسمها انكتب بماء الدهب
فكتب الدكتور برصوم كساب ردا عليّ
الموال التالي :
حروفك بالهوى فيها دوا لي
خمرة معتقة بدم الدوالي
بعتابا وميجنا جيت بدوالي
الأوف وآه وفنون الطرب
فأجبته :
خمرة معتقة والكأس كاسي
وأنا للشعر ثوب العز كاسي
الحمد لله للوهاب كاسي
طير البر بيريش الذغب
فكتب الاستاذ مفيد نبذو
الموال الأول :
كنا صغار عم نلعب عبابا
صارت تنده تنادي ع بابا
ولما نهودها عبو عبابا
ماعد للولف تحسبلو حساب
الموال الثاني :
ندهتلك أنا من الرب برجي
ياحلوة يكون برجك متل برجي
تعمرلك ع جنح الغيم برجي
وخلي القمر حارس ع البواب
فأجبته :
الموال الأول
ندهت الرب جاب الرب برجاي
عسى يتوافقو برجك ع برجاي
لخوض البحر بفلكي ع برجاي
حتى اخطفك يام العصاب
الموال الثاني
برجي يابنت وافق ع برجك
وانا في خيمتي وانت ع برجك
ربي بالسما دوما ع برجيك
تكوني خلتي يامام الهداب
فكتب الدكتور ثابت عبدالله عدة مواويل أثبت إثنان منها
الموال الأول :
ياغالي حاج تتكبر ع موجوع
بكرا الرب يبعتلك عمى وجوع
البحر لما ردت اعبر عموجو
عرفت انوحكم الرب صاب
الموال الثاني :
طبيبي قال مافيني كريات
ولعيني مابقي بعدك كريات
دموعي ع الوجه صاروا كريات
عاصي حما اللي طوف الغاب
فأجيبه الآن :
الموال الأول :
أنت لبوتي وأنا أسد لك
بدي صفصف جعودك وسدلك
جعلي يابنت من زندي وسد لك
نامي للعمر نوم الهنا
الموال الثاني :
عتم وضباب والدنيا مطر طق
وصرلو زمان قبقابك ماطرطق
متى ابتعدت عنك متر طق
قلبي والنبي صابو عطب
بقلمي/الدكتور عيسى العيسى/
جبلة سوريا
تعليقات
إرسال تعليق