موال شروقي...بقلم الرائعة الشاعرة د. فضاء فتالة
موال شروقي...............
سهران ع ضو القمر عم دوزن الأشعار
وانطر عهاك الدرب مثل عصفور مذبوحي .
غفيت عيون القمر والليل صار نهار
وبعدني بهاك الدرب عم بلسم جروحي
شكّلت حروف الغزل وبرمجت هالأوتار
نغمة كمان وناي وصوت الصدی مبحوحي .
ومن كوثر الجنّة فاض السحر أنهار
وقلبي غصْ من القهر كنّو بحجر مطروحي .
شارد يمين شمال شلْ الفكر محتار
غايب عن عيني دهر وغابت معو روحي .
اجاني ع فرس أبيض مهفهف بريحة غار
قلّي يابنت اصْحي حاجي بقی تنوحي .
انكوينا قبلك بالهوی وياما اكتبت أشعار
مابظن ينفعنا النّوَی وسرّك لا بقی تبوحي .
عصفورك بهاك الدرب قطفلي وردة وطار
اجيتك والوردة معي ومعها خذي روحي .
مساؤكم وعطر الورد بقلمي فضاء فتالة
تعليقات
إرسال تعليق