عودة الأخلاق...بقلم شيخ السجالات البدري زايد
في مبادرة من اجل عودة الأخلاق
فين أخلاق المصري زمان
كنا اخوات مش بس جيران
كان الكل في حضن الكل
مش ح نقول ماهو كنا وكان
كنا بنقسم سوا لقمتنا
وبنسهر مع بعض ف بيتنا
وبنتعشي ونشرب شاي
والناس تسمع صوت ضحكتنا
وكبيرنا بيعطف ع الكل
قلبنا أبيض زي الفل
وماحدش يشتم ويزعق
والفرحة ف شبابيكنا تطل
والشارع كان كله شهامة
محترمين عايشين بكرامة
مافي تحرش ولا تطبيل
والمصري مرفوع الهامة
واما بتحصل كارثة نقوم
لو في طوفان الكل يعوم
أو في الفرح نشارك بعض
ومفيش فينا واحد محروم
أسأل كل الدنيا علينا
الخيرات كات ملو ادينا
علمنا العالم بشياكة
وزرعنا وحضارتنا بنينا
أخلاق المصري المعروفة
كانت للإنسان موصوفة
زي روشتة نعالج بيها
كل الأخطاء المكشوفة
صبر وحكمة ونور وإيمان
وتعاون ضد الحرمان
ولابلطجة ولا أي تطرف
وشجاعة ف بلد الشجعان
صوتي باضمه إليك ياحبيبي
نرجع للأخلاق ونصيبي
إني اساعدك وابقي نصيرك
في مبادرة وبتعالج عيبي
ويكون ليها شعار مرفوع
الأخلاق هي الموضوع
واللي يحب يشارك فيها
مش متصادر ولا ممنوع.
تحياتي
شيخ السجالات
البدري زايد.
تعليقات
إرسال تعليق