حاولت أعيش من غيرك ...بقلم الكاتبة صباح السالم
حاولت أعيش من غيرك
بصراحه معرفتش
مش علشان كان في حب
ومن غيرك روحي رايحه وبوجعها مسلٍمتش
لا خالص
كل الحكايه قلبي مكسور ولدواه مقدرتش
كل يوم الصبح أتفائل
كل يوم الصبح عن ذكر الله مغفلتش
كل يوم الصبح
أقول يا بت يوم جديد غيري مودك بقى
غني و بروحك غردي كفايا شقا
ورغم كده بحضن السكينه مسكنتش
حاولت كتير أتصل لكن لسه عقلك منفصل
وقلبك لساه قاسي مبيحنش
قولتك كتير أني معشتش
كان نفسي بس أحب والوجع منك فيا ميهدش
كان نفسي بس أدلع وأحسك ويايا مبعدتش
مبتردش
ولو رديت يعني حتقول إيه
عايزه ترجع ترجع ،، أنا ماسيبتش
ستظل كعهدك
كائن مغرور عايش لنفسه حتي بقلبي ماسدش
متعليش صوتك وتقول مش عاجبها حاجه
منك مكنتش عايزه غير ضمه وحضن
منك مكنتش حاسه غير بس بتقصير وحزن
فيه كلام من غير تزييف عليه ميتردش
والرد إيه
علي قلب قاسي حتي باللي منه م اهتمش
لساك مفهمتش
إن روحي اللي لملمت شتاتك
وقت كنت جاف حتي دفا قلبك مبيحنش
متظنش
لحظه واحده أني ب اكتب وعايزاك
كل الحكايه الأشعار ووجعها وحياتنا متسرش
آه من وجع خلفته
وقلبي اللي كنت تقول طيب وبيستنجد سيبني أعيش
إزاى من تاني ترجع تنهش زي الديابه
عارف روحي لأي حد مبتطاطيش
أرجوك من تاني عن الفراق متسألنيش
سألوني كتير قوليلنا ليه مبتتصالحيش
قولت وأنتم فاكرين من غيره عارفه أعيش
فاكرني حاقول الحياه من غيره تساوي
الحقيقه إنها متساويش
بس في حاجات كتير أنتم عنها متعرفوش
أنا تعبت معاه
محدش منكم جبر خاطري ولو بدعوه
يارب تخلص منه ومن شره تنساه
عُمر مر وهو حر وأنا شايله عياله وشيلاه
وبالنهايه حسسني أني بعمره حتي بأقل القليل قيمتي عنده متساويش
أصل الحكاوي منه كانت كذب في كذب
تخيلوا حتي مرواحي لأمي كانت دموع متنحكيش
محايله وألف محاوله وبكل جوله
كان التمن جسد مات كل لمسه كانت شوك
أرض من الكره صار إحساسها جاف مبيترويش
قولتله
طيب والعمر اللي راح في الشقا وخدمتك
قالي زيك زي غيرك عملتيه علشان ربنا
إنما أكتر من لقمتك وعيالك متستهليش
يامن قُسم واترسم واتحايل وبكا
ونافق ،، لجل بس عليه أوافق
فهمتني غلط
الفلوس بتروح وتيجي
أما لُقا الحبايب ولمتهم مال الدنيا ميعوضوش
يا خاين العشره يا دهب قشره
يا شهد القرب منه أكبر كسره
كنت علي حق بكلماتك المسمومه لو خرجتي مترجعيش
بجد شكرا كان نفسي فيها يوم لقانا
كان نفسي أحلم حلم إسمه الحريه
وانا بعيده عن قلب طول عمره بياخد ومبيديش
مش مهم إنك أناني
مش مهم إنك فرطت ف اللي منك وعايش مجافي
لكن الأصعب بجد ،،،، غفلتك إنك فاني
وطالما وصلت لمرحله زيها بالقسوه مشفتش
الحمد لله أني زي م انا متغيرتش
ورغم مرور سنين علي الفرار
لسايا باقول لنفسي حلم ده ولا حقيقه
صدقني أصلا لحظه واحده متخيلتش
أني من جوايا قويه ومهما قلتلك عني
ح اقول بدونك عشت الحياه وشيفاها جنه
حتي ولو ضاقت جوايا راضي وبيضحك
واقول لنفسي اللي عاش حياتي
حيعرف إن الفلوس مجرد وسيله
أما السعادة فقد حصلت عليها بلمه وأحلي ضمه
أما أنت فلن تحسها ،، لإنك ببساطه مقدمتش
حتي ضمتك لحنانيك حرمتهم منها
وغير الماده مشوفتش
إوعاك أسمعك تقول كله علشانهم
خسرت ردهم ، كان نفسهم بس بقلب يحاورهم
عيش حياتك لاهي سرقاك الدنيا والدواهي
واتركنا لحالنا نعيش ،، باللي منا مٍنك باقي
،،،،،،،،،،،،،،،
بقلمي صباح سالم
خليك بعيد
تعليقات
إرسال تعليق