دمعة وفى...للشاعرة عفيفة حيدر

دمعة وفى 

.....

قصة من الاهات معصورة

وبلجة الالام مغمورة

حبيتها حب النحل للزهر

وبروزت الها بالقلب صورة

.....

كنا مثيلة ومضرب العشاق

حبنا خلق من نفحة الخلاق

بقلبي وبقلبا ساكنة الاشواق

بنينا بمحراب الوفى ديورة

.....

وفجاة انفجر ببلادنا بركان

وبديت حكايت كان ياما كان

عميو العيون...تقطع الشريان

ودم الطهارة شكل نهورا

.....

ونصبو حواجز بينها وبيني

وقلعو الشجر والزهر والتينة

ضاع الامان وخربت الزينة

وصارت عن العينين محظورة

.....

ركبت الخطر كل يوم حتا شوف

رغم الرصاص وبرقت السيوف

الحب البقلبي حارب الالوف

تا ضل داوي عيون مقهورة

.....

وبيوم ضاع من الوعي اسمو

والحي بلش يختفي رسمو

وبديت قطع تتفرق بجسمو

وما ضلت العورات مستورة

.....

ونزلت قذيفة فوق سطح البيت

سمعت الخبر...عا بيتها هبيت

تمنيت اعمى ولا شفت شو لقيت

عا دمها الحجار مخمورة

.....

طيلعتها وهزيتها مرات

ما نطقت ولا نفعت الكرات

بديت لصوب الاخرة زيارات

وتركت بقلبي عالبعد جورة

.....

الصحرا ارتوت من دمعت الهجران

وما ضل عندي بالارض عنوان

كل يوم بعزف اسمها الحان

وبدعي الحلم يجبر الي كسورة

.....

سبحان الله اللي تركلي الروح

وما كنت حدها بالارض مشلوح

بتضل يومية قبالي تلوح

وتقول ارضى بقسمتك البلاد

مش ذنبها بالصار...معذورة

وبقيت حامل روح مشطورة