ست البنات بقلم أشرف رسلان
سِت البَنات
سِت البَنات
في قَلبي لِيها ذكريات ...
آه من حلاوة رسمها
وِسط البنات ...
لما تُمرّ جَنبنا
تِلمح ف عِنينا سُكات ...
قُلبي وَراها بِيتخِطف
يُصرخ آهات ...
روحي تهفف
سارحة معاها ف ضلها
كان نفسها
تِعرف حَاجات ...
عِيونا كانت مشتاقين
لِطلة من سِت
البنات ...
لما تِظهر
يِظهر رَبيع
زُهور تِفتح ف الشِّتا
نِسمة تِهفهف شَعرها
يابَختها ...
تِضحك
والضِّحكة سِيل
يروي عَطش المَحرومين
من بسمة حلوة
لثغرها ...
تِطرح آمال
لكل واحد مِننا
إزاي يحقق حلمها ...
ألفين قصيدة
ألفين قصيدة كتبتها
أوصف ملامح جسمها ...
وِف وَصفها
بِين السطور تَاهت
حروفي كلها ...
أوصف إيزيس
فوق القمر كان عرشها ...
بدر وساطع ف السما
بريق بيضوي
لسحرها ...
غابت
والشمس غابت عننا
وِراح نهاري من سنين
تلاتين سنة
روحي وقلبي كانوا ليها
مشتاقين
آه لو تمر جنبنا في حينا
وِسط نَاسه الطيبين
بقلم_أشرف رسلان
تعليقات
إرسال تعليق