جوزك مين بقلم د.صلاح شوقي
الزَّجَلية الاجتماعِية
( جُوزِك مِين؟ )
يا ترى جوزِك ( سِي السَّيد ) لو كَح
الكل ياخد دِيله في سنانه؟
أو حِمش بيحسب الإئتماره شطاره
والكل يخرَس ، كلامه تحت لسانه
ولَّا جُوزك ( إمَّعَه ) ، كلام أُمُّه كلُّه
منفعه ، هوا عِين العقل وميزانه
مهما تِهَاتِى ، وتقولي كفاية يا حماتِي
هيا مسلَّطاه بتدَودَو في ودَانه
ولا جُوزِك طُحَاله كبير ، ينهَج
من التفكير طولِة البال عِنوانه
أو جُوزِك حَزَّوقه زَمُّوقه عامل
أسطى يخنق القُطه ، كارِِه زَمانه
ولا نِكدِي يكشِر يجَلَّب الغَم ، يحرَق
الدَّم ، عمره ما ضِحِك و بانت سِنانه
أو مايهِمُوش طالع لأهله ، يهوَّن
السجن على اللى داخله كتير أحزانه
ولَّا جوزك يقعد مبَلَّم ، لا يتكلم
يتعجَّب ، من كتر الصبر ، انخرب دكانه
تتمَنِّى اليوم يعدِّي ، هاتي و وَدِّي يشخُط
ويمد إيدُه ، وان تعب تموتِي عَشانه
أو وقعته بطيخة قرعه ، عنك مشغول
بالحريم في المصارعه ، زوَّدت جِنُانه
أو يخَاصِم ويُهجر عُمرُه مايُشكُر
يُغدُر ، عِينه زَايغه ، كِتير نِسوَانه
ولا جُوزِك نرجِسى عاجبُه حاله
مُعجَب بجَماله ، شَاب قبل أوانه
ولا في الغزل بيُعرج ، عاوزاه يُخرُج
، نسيتى الخطوبه وعزف البيانو
أو هوا نِعمَ الرِّفِيق ، طيب بَرِيء
حنين ورقِيق ، يقشر المُوز بِسنانُه..........
جُوزِك مِين ؟
*************
د. صلاح شوقي.......مصر
تعليقات
إرسال تعليق